呢幾年香港人都叫做豪左，中意四圍去下旅行咁
我又留意到近年飛行里數計劃 (例如 Asia Miles，英航 Executive Club ) 特別多推廣，好多信用卡/銀行開戶優惠，甚至唔同商鋪都用飛行里數優惠做招徠，而且成功吸引到唔少人參與其中。
我先唔好逐間銀行逐個promo講，不如講返最基本: 其實儲飛行里數抵唔抵?
由於飛行里數唔係錢，而換到既機票又係浮動價格既消耗性物品，所以好難衡量究竟點先為之抵，點先為之唔抵。係呢到我會用比較簡單少少既方式嘗試解構一下
首先，儲飛行里數究竟有咩成本呢?
其實呢個視乎你點儲，我逐一方式講解一下:
1. 搭飛機
如果坐長途機/出差通常都會有里數儲，而如果係出公數，咁你既成本就當然係0啦，而長途機有時冇咩選擇，都係坐CX/BA呢d既話，唔多唔少都會有幾千里比你儲下
至於飛短途，例如香港人最中意既台灣日本韓國東南亞之類，買特價票都只會得幾百里甚至咩都冇。尤其是近年多左UO/AK/MM 呢d廉航，我地更加少係搭飛機儲到里數。
會唔會特登為左儲里數而搭CX/KA/JL? 呢d就係另一個成本。如果廉航係$2000，而傳統航空公司要$3000，而你儲到既里數可能只係果1000~2000里，如果你又唔係邊間航空公司既忠實擁躉，你果$1000既差別就係用黎買你坐闊d同埋果1000~2000里，抵唔抵就見仁見智，但我個人就唔buy。
2. 信用卡
相信唔少人都有用信用卡儲下里數咁，但其實儲黎儲去都係得果幾千到一萬，畢竟除左迎新之外，最好果張卡都要$5先儲到一里，咁講緊簡簡單單去個台灣都要15000里 x $5 = $75,000碌卡洗費，或者去個日本都要 30000里 x $5 = $150,000碌卡洗費。
而碌卡儲分，其實有d洗費都係必要開支，例如話有d人一年點都去食返3幾千生日飯，咁可能覺得反正都係碌，我依家碌有里數儲，冇多餘成本丫。
咁諗又唔啱wor，例如話碌$3000飯，你用A銀行卡可以儲到600里，而如果你用B銀行卡，係可以得到$168既等值回贈，所以你儲呢600里既成本就係呢$168。咁究竟揀$168定600里呢? 不如再睇落去下面里數既價值部分。
3. 食飯
有d里數計劃係有partner餐廳。係指定餐廳食飯，就可以得到消費金額x某個比例既里數
咁我地係呢個地方食飯又有咩成本呢?
首先撇除可以儲里數，你會唔會揀呢間餐廳呢? 你覺得佢既野食好唔好食同抵唔抵呢?
如果你係為儲里數而揀呢間餐廳，而食貴左，咁呢個又係你既成本啦。
4. book 酒店
某幾間網上book酒店既agent係可以儲里數既，咁就可以同時又食信用卡積分，又食額外里數。不過留意究竟個價錢會唔會貴過其他網站呢? 而個差價又值唔值呢?
5. 好多其他
其實好多方法都大同小異，要諗下唔儲里數既話，你有冇第二個選擇，而第二個選擇既價錢係相差幾遠呢? 會唔會其實賺到既里數唔值個差價呢?
好啦，講完成本，係時候講下里數既價值
里數可以攞黎換機票，book酒店，換禮物，甚至幫親朋戚友出機票之類
我地簡單睇下以下唔同例子之下，里數係值幾多錢
1. 短途機票 - 經濟艙
以香港人最熟悉既AM為例，15000里去台灣，30000里去日本/韓國
相對之下，CI/BR/HX/CX 飛台灣大概係$700~$1500不等
廉航飛日本韓國大約係 $1000~1500 不等
傳統航空公司飛日韓大約係 $3000~4000不等
如果你係有廉航恐懼症，一定唔坐廉航
咁其實30000里飛日韓之下，你每1里大約值$0.1~$0.13左右
而淡季台灣因為實在太平既關係，每里對你黎講就只係值$0.05~$0.1
2. 長途機票 - 經濟艙
其實早幾年香港飛歐洲美國既機票都比較貴，大約要$8000~9000先買到直航來回機票
係冇廉航選擇之下，
以60000里飛歐洲，每一里都值$0.13~0.15
不過今年油價回落，直航機票價格跌到$6000左右，變相每一里只值$0.1
3. 商務艙/頭等艙
無論飛日本韓國定係飛歐美長線，坐下Business/First Class又幾爽既，如果你係想搭下Business做下人生勝利組既，咁儲里數就啱喇
事關坐個Business/First閒閒地都貴過econ幾倍
例如話想搭個Business去日本，$10000都走唔甩，但如果用里數，40000~50000里就得，變相你每里係值成$0.20~0.25
長途機既Business Class就更加誇張，$40000機票可以用120,000里數搞掂，每里值$0.33
頭等既話就更加抵啦
4. book酒店/換禮物
簡單少少就係開個格價網睇下呢個禮物/酒店究竟值幾多錢，然後除返所需既里數，就知每里值幾多錢
睇完成本同埋價值，究竟點樣玩先抵呢?
首先，我建議了解自己既旅行模式同習慣，然後係消費模式
如果你係搭開廉航飛短途多既，冇諗過去長途，更唔會比貴少少搭Business，對你黎講每里數最多都係值果$0.05~0.075
如果你係搭開傳統航空公司既，又會去下長途既，里數價值對你黎講可能大約係$0.1~0.15之間
呢個價值係因人而異，所以好難一概而論。
我自己黎講，又會去下長途，又會去下短途，廉航又搭下，傳統又搭下，里數大概就係$0.1~$0.15左右。
了解左自己對里數評出黎既價值之後，就係時候諗下你每里數既成本究竟係幾多
例如話市面上有幾張好普遍既6=1里數既信用卡，相對其他信用卡既0.4%回贈，佢係每$10回贈1.67里，即係話4仙換1.67里，即係$0.024一里，比起價值低好多，咁當然好啦
如果另一個情況，其他信用卡係回贈5%，你每里既成本就會係$0.3，就未必咁抵lu
簡單d黎講，儲里數時可以攞住一個參考價值，低過呢個價值我地就儲，出機票時如果高過或者等於果個價值就用，就會方便好多。咁樣落去，每年儲埋儲埋可以慳到$10000~20000架!!
